თქვენი უფლებების პროფესიული და თანმიმდევრული დაცვა

პროფესიული საქმიანობა

1988–1989 წლებში იყო ბათუმის ბავშვთა რესპუბლიკური საავადმყოფოს №2 თერაპიული განყოფილების სანიტარი; 1991–1992 წლებში — ბათუმის სახელმწიფო უნივერსიტეტის ახალგაზრდული საწარმოო გაერთიანება „ჯორჯიას“ გენერალური დირექტორი; 1992–1994 წლებში — ბათუმის ბაგრატ კურაპალატის სახელმწიფო სამართლის ინსტიტუტის პრორექტორი.

1995–2003 წლებში იყო ამავე ინსტიტუტის რექტორი, ადმინისტრაციული სამართლის კათედრის გამგე, კონსტიტუციური სამართლისა და სახელმწიფოსა და სამართლის თეორიისა და ისტორიის კათედრის გამგე და დოცენტი.

1996–1998 წლებში იყო აჭარის ავტონომიური რესპუბლიკის იურიდიული განათლების ფონდის გამგეობის თავმჯდომარე და სამართალდამცავ ორგანოებთან ურთიერთობის, კორუფციის წინააღმდეგ ბრძოლისა და ადამიანის უფლებათა დაცვის კომისიის ხელმძღვანელი.

1996 წლიდან არის საქართველოს ეროვნული აკადემიის საპატიო აკადემიკოსი და სამართლებრივი კვლევის განყოფილების ხელმძღვანელი.

2002–2004 წლებში იყო შპს „აკადემიკოს ივანე ჯავახიშვილის სახელობის ბათუმის იურიდიული აკადემიის“ ადმინისტრაციული სამართლისა და პროცესის კათედრის გამგე და დოცენტი; 2003–2005 წლებში — რექტორი; 2005 წლიდან — გენერალური დირექტორი.

იურიდიული და საზოგადოებრივი საქმიანობა

2005–2006 წლებში იყო ბათუმის იურიდიული აკადემიის იურიდიული მომსახურების ცენტრის — „იურვერსის“ სისხლის სამართლის საქმეთა განყოფილების ხელმძღვანელი და ადვოკატი; ასევე შპს „იუპიტერისა“ და შპს „ევრომშენის“ იურიდიული სამსახურის უფროსი.

2006 წლიდან არის დამოუკიდებელი გაზეთის „აჭარა PS“-ის იურიდიული სამსახურის უფროსი, ხოლო 2019 წლიდან — გენერალური დირექტორის პირველი მოადგილე. 2006 წლიდან არის საქართველოს ანტიკორუფციული პალატის თავმჯდომარე და განსაკუთრებით მნიშვნელოვან საქმეთა გენერალური ანტიკორუფციონერი.

2008 წლიდან ხელმძღვანელობს შპს „ბათფარმას“ გენერალური დირექტორის ადმინისტრაციის იურიდიულ დეპარტამენტს. 2019 წლიდან ხელმძღვანელობს შპს „პრიმულას“, შპს „კარეგოს“ და შპს „ქინგ დევიდ გროუპის“ იურიდიულ სამსახურებს.

აღიარება და მაღალი თანამდებობების კანდიდატურა

2019 წელს ბორდის მიერ მიენიჭა „პერსონა-2019“-ის საპატიო ტიტული სამოქალაქო სექტორის განვითარებაში შეტანილი თვალსაჩინო წვლილისათვის; 2020 წლიდან ამავე ბორდის წევრია.

საქართველოს სამართლის დარგის მოღვაწეთა უმაღლესი სარეიტინგო საბჭოს მიერ 2015–2019 წლებში ზედიზედ დასახელდა ქვეყნის საუკეთესო ადვოკატთა რიგებში.

2019 წელს მისი კანდიდატურა საქართველოს იუსტიციის უმაღლესი საბჭოს მიერ წარდგენილი იყო საქართველოს უზენაესი სასამართლოს მოსამართლის ვაკანტურ თანამდებობაზე, შერჩევის 50-კაციან სიაში. მისი კანდიდატურა ზედიზედ სამჯერ განიხილებოდა საქართველოს გენერალური პროკურორის თანამდებობაზე ასარჩევად; ასევე დასახელებული იყო საქართველოს უზენაესი სასამართლოს თავმჯდომარის, აჭარის ავტონომიური რესპუბლიკის მთავრობის თავმჯდომარისა და ბათუმის მერის თანამდებობებზე.

აკადემიური და სამეცნიერო საქმიანობა

1997 წელს, 25 წლის ასაკში, თბილისის სახელმწიფო უნივერსიტეტის იურიდიულ ფაკულტეტზე დაიცვა დისერტაცია იურიდიულ მეცნიერებათა კანდიდატის სამეცნიერო ხარისხის მოსაპოვებლად თემაზე — „საქართველოს ადმინისტრაციული სამართალდარღვევის კანონმდებლობის კოდიფიკაციის პრობლემები“. სამეცნიერო ხელმძღვანელი იყო პროფესორი ვალერიან ლორია.

ნაშრომი შეფასებული იყო როგორც ქართულ იურიდიულ ლიტერატურაში ადმინისტრაციული პასუხისმგებლობის სფეროში კანონმდებლობის კოდიფიკაციის საკითხების მეცნიერული კვლევის ერთ-ერთი პირველი მნიშვნელოვანი ცდა. სადისერტაციო საბჭოს წინაშე წარდგენილი იყო ადმინისტრაციულ სამართალდარღვევათა კოდექსის დისერტანტისეული ვარიანტი.

ეწევა აქტიურ სამეცნიერო და პედაგოგიურ საქმიანობას და არის იურისტთა თაობების აღმზრდელი. არის 30-ზე მეტი იურიდიული სახელმძღვანელოს, მონოგრაფიისა და სამეცნიერო სტატიის ავტორი, თანაავტორი ან შემდგენელი.

გამორჩეული ნაშრომები

• „შესავალი იურიდიულ სპეციალობაში“ — ლექციათა კურსი იურიდიული ფაკულტეტის პირველი კურსის სტუდენტებისთვის; ბათუმი, იურიდიული ლიტერატურა, 2001, 96 გვ., ISBN 99928-49-06-1.
• „ადმინისტრაციული პასუხისმგებლობის პრობლემები“ — სპეციალური კურსი; ბათუმი, იურიდიული ლიტერატურა, 1999, 67 გვ., ISBN 99928-49-02-9.
• „საქმისწარმოების საფუძვლები“ — ლექციათა კურსი, 132 გვ.

ჯილდოები და ბიოგრაფიული გამოცემები

• 2002 — ბათუმის სამართლის ინსტიტუტის დამსახურებული მუშაკი.
• 1997 — ბათუმის სამართლის ინსტიტუტის საპატიო სიგელი.
• 1997 — ბათუმის სამართლის ინსტიტუტის უმაღლესი ჯილდო, სამართლის ქალღმერთ „თემიდას“ მედალი.
• 1996 — აჭარის ავტონომიური რესპუბლიკის უზენაესი საბჭოს განათლების აღორძინების ფონდის საპატიო სიგელი.

მისი ბიოგრაფია შეტანილია საქართველოს პარლამენტის ეროვნული ბიბლიოთეკის ბიოგრაფიულ ლექსიკონში, სამართლებრივ საერთაშორისო პორტალზე „მსოფლიოს ცნობილი მეცნიერ-იურისტები“, ცნობარში „ვინ ვინ არის საქართველოში — Who is Who in Georgia“ (2009) და ბიოგრაფიულ ცნობარში „საქართველოს ოქროს სახელები“.

საადვოკატო პრაქტიკა

პაატა შავაძის ადვოკატობით საქართველოს საერთო სასამართლოების მიერ გამოტანილია არაერთი გამამართლებელი განაჩენი ნაკლებად მძიმე, მძიმე და განსაკუთრებით მძიმე დანაშაულთა საქმეებზე; ასევე აღდგენილია არაერთი დარღვეული უფლება და კანონიერი ინტერესი სამოქალაქო და ადმინისტრაციული სამართლის საქმეებზე.

იყო საქართველოს ადვოკატთა ასოციაციის ადმინისტრაციული და საგადასახადო საქმეთა კომიტეტის თანათავმჯდომარე; ამჟამად ხელმძღვანელობს სისხლის სამართლის აჭარის რეგიონულ კომიტეტს. მის მიმართ საადვოკატო საქმიანობის 15 წლის განმავლობაში ასოციაციის ეთიკის კომისიის მიერ დისციპლინური ზემოქმედების ზომა არ გატარებულა.

სხვა საქმიანობა და ოჯახი

არის საქართველოს კარატე დო შიტორიუ სიეშინკაის აჭარის ფედერაციის პრეზიდენტი და ყავისფერი ქამრის — პირველი კიუს მფლობელი; დასახელებული იყო ბათუმის საპატიო მოქალაქედ. მონაწილეობა აქვს მიღებული სამართლებრივ საკითხებზე გამართულ მრავალ ტრენინგში, სემინარში, საერთაშორისო და ადგილობრივ სამეცნიერო კონფერენციაში.

პაატა შავაძეს ჰყავს მეუღლე და ქალ-ვაჟი.